{"id":105379,"date":"2023-10-11T12:03:02","date_gmt":"2023-10-11T10:03:02","guid":{"rendered":"https:\/\/woordfees.co.za\/uncategorized\/goed-wat-wag-om-te-gebeur\/"},"modified":"2023-10-11T12:03:02","modified_gmt":"2023-10-11T10:03:02","slug":"goed-wat-wag-om-te-gebeur","status":"publish","type":"post","link":"https:\/\/woordfees.co.za\/en\/theatre\/goed-wat-wag-om-te-gebeur\/","title":{"rendered":"Goed wat wag om te gebeur"},"content":{"rendered":"\t\t
\n\t\t\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t
RESENSIE<\/h6>\t\t\t\t\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t

Teater soos opehart-chirurgie\n<\/h2>\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t

deur Herschelle Benjamin<\/strong>
Produksie: Goed wat wag om te gebeur<\/strong>
Foto’s: Nardus Engelbrecht<\/strong><\/p>\t\t\t\t\t\t\t\t<\/div>\n\t\t\t\t<\/div>\n\t\t\t\t

\n\t\t\t\t
\n\t\t\t\t\t\t\t
\n\t\t\t
<\/div>\n\t\t<\/div>\n\t\t\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t

Verbeel jou hoe dit moet voel net voordat die narkose se verdowing inskop en jy na die operasiesaal vir opehart-chirurgie geneem word. Die vreesaanjaendheid wat jou op hol neem soos jy dink aan jou geliefdes en of jy in een stuk anderkant sal uitkom. Die vertroue wat jy in die mediese bystandspan en chirurge moet h\u00ea vir die taak wat voorl\u00ea. En die wete dat jy soos \u2019n dooie vis opgesny gaan word en aan jou binnedele getorring word. Dit verg \u2019n spesiale soort gemoedskrag.\u00a0<\/p>

Dit is hoe jy in die gehoorsaal sit terwyl jy kyk na Goed wat wag om te gebeur<\/em>. Asof die span chirurge besig is om diep binne-in jou te gaffel met al die verborge en sensitiewe dinge. Die stuk voel aan die begin soos \u2019n Sweedse noir-film, wat met Hendrik se terugkoms na sy ouerhuis voel asof die gewig van sement tree vir tree op die gehoor se r\u00fbe gelaai word. Dan begin die Lego-blokke van die storie deur die drie akteurs sorgvuldig en met beheersdheid uitgepak word. Dit maak jou nuuskierig. Wie is die vrou aan die buitewyke, van wat lyk na \u2019n voorstelling van \u2019n kamer, sentraal in die middel van die verhoog? Albei is verstrengel in hulle verskillende milieus en Hendrik, vertolk deur Gideon Lombard, lyk afgeransel en diep verdrietig. Hy klap sy eerste bier van vele meer wat gaan volg en die vroue beweeg stram rondom sy w\u00eareld.\u00a0<\/p>\t\t\t\t\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t

\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t\t\t\t\t\t\t\"\"\t\t\t\t\t\t\t\t\t\t\t\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t

Totdat die jonger vrou as Katinka, sy suster, en sy meisie, Elana, vertolk deur Emma Kotze, in en rondom sy spasie meer Lego-blokke bymekaarsit om die raaisel stuk by stuk te voltooi. Dis eintlik nie eens oor Hendrik nie. Dis oor sy pa, sy bloedlyn, sy DNS… Die chromosome van jou ouers wat \u2019n \u201cspiraal vorm en dis hoe jy jy word\u201d. Dis daarin waar die \u2018goed wat wag om te gebeur\u2019 is. S\u00f3 hoor jy van die familie wat nes baie families struikel onder die vlek van \u2019n besmette bloedlyn. \u2019n Meesterlike teks deur die skrywer en regisseur Philip Rademeyer wat niks sommer s\u00f3 op \u2019n skinkbord bied nie. Hy wil jou intrek en intrek totdat jy verby die punt van terugkeer is. Jy leun lateraan vorentoe soos jy aangegryp word deur Antoinette Kellermann as die moeder-ma, die verdrukte ma, die besliste ma… Jy sit verskrokke in vervoering van Lombard se vertolking en voel Kotze se verskuiwings van haar karakters se intensies.<\/p>\n

Die middelste gedeelte van die verhoog, waar \u2019n blou rusbank in die middel staan, is die spilpunt waarom als gebeur en die portret aan die kant \u2019n konstante herinnering van \u2019n \u201cspook\u201d <\/em>te midde van ons almal. Omring deur swart wynbottels, laat Rademeyer jou verstaan dat Hendrik, wat heeltyd binne die sirkel bly en nie een keer uittree nie, verstrengel is binne \u2019n \u201ctronksel\u201d van verslawing. Die doppies spring, die le\u00eb bottels raak meer, die Lego-blokke uiteindelik rondgesmyt na afloop van \u2019n slim, beheersde trant vir die ontknoping. Laasgenoemde mag ek nie vertel en enigiets verklap nie.<\/p>\n

Dit is dan wat  jy vir die eerste keer besef wat nou hier aan die gebeur is \u2013 Rademeyer met sy spelers se uitmuntende vertolkings, is besig met opehart-chirurgie op jou \u2013 met \u2019n briljante teksvertaling van sy The Graveyard<\/em>-stuk en effektiewe regisseurshand. In die gestroopte verhoog l\u00ea jy maar nes die karakters bar en kaal om vir ewig anders anderkant uit te kom.<\/p>\n

<\/p>\n