{"id":105398,"date":"2023-10-15T16:28:14","date_gmt":"2023-10-15T14:28:14","guid":{"rendered":"https:\/\/woordfees.co.za\/uncategorized\/the-dante-string-quartet-points-of-origin\/"},"modified":"2023-10-15T16:28:14","modified_gmt":"2023-10-15T14:28:14","slug":"the-dante-string-quartet-points-of-origin","status":"publish","type":"post","link":"https:\/\/woordfees.co.za\/en\/classical-music\/the-dante-string-quartet-points-of-origin\/","title":{"rendered":"The Dante String Quartet: Points of Origin"},"content":{"rendered":"\t\t
\n\t\t\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t
RESENSIE<\/h6>\t\t\t\t\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t

Strykkwartet voer mee met klankreise\n<\/h2>\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t

deur\u00a0Willem Bester<\/strong>
Produksie: The Dante String Quartet: Points of Origin<\/b>
Foto’s: Verskaf<\/b><\/p>\t\t\t\t\t\t\t\t<\/div>\n\t\t\t\t<\/div>\n\t\t\t\t

\n\t\t\t\t
\n\t\t\t\t\t\t\t
\n\t\t\t
<\/div>\n\t\t<\/div>\n\t\t\t\t\t\t<\/div>\n\t\t\t\t<\/div>\n\t\t\t\t\t<\/div>\n\t\t<\/div>\n\t\t\t\t\t<\/div>\n\t\t<\/section>\n\t\t\t\t
\n\t\t\t\t\t\t
\n\t\t\t\t\t
\n\t\t\t
\n\t\t\t\t\t\t
\n\t\t\t\t
\n\t\t\t\t\t\t\t\t\t

Die bekroonde Dante-strykkwartet word as een van die voorste ensembles in die VK beskou. Van die vier spelers is twee Suid-Afrikaners \u2013 die \u201cbeter helfte\u201d, het Zo\u00eb Beyers (eerste viool), volgens programnotas en die webwerf, tong ferm in die kies geskerts. Sy is \u2019n Stellenbosse boorling en deesdae onder meer die konsertmeester van die BBC Filharmoniese Orkes. Ian Watson (tweede viool) het onder Suzanne Martens aan die Universiteit Stellenbosch gestudeer voordat hy sy studies in Skotland voortgesit het. Die ander helfte van die ensemble is dan Carol Ella (altviool) en Richard Jenkinson (tjello).<\/p>

Volgens Albert Combrink se gedetailleerde programnotas \u2013 beskikbaar by Inside-the-Concert-with-Albert-Combrink-Dante-Quartet.pdf<\/a> \u2013 is die instrumentkonfigurasie van die strykkwartet \u201c \u2019n lakmoestoets\u2026 een van die grootste uitdagings\u201d vir enige komponis. Vrydagaand se uitvoering was inderdaad \u2019n kragtoer van epiese proporsies.<\/p>

Die program het geopen met Haydn se Strykkwartet in B-mol majeur (\u201cSonsopkoms\u201d), op. 76, nr. 4<\/em>, \u2019n relatiewe laat werk uit die meester se oeuvre, met \u2019n meer simfoniese begrip as sy vroe\u00ebre kwartette. Met sy omvangryke klank het die ensemble goed vertoon, van die delikate adagio<\/em> tot die indrukwekkende finale<\/em>.<\/p>

Volgende was twee Amerikaanse komponiste aan die beurt. George Walker (1922 \u2013 2018) was die eerste swart komponis wat in 1996 die Pulitzer-prys vir Musiek vir sy werk Lilacs<\/em> ontvang het. Dit is egter die Lyric for Strings<\/em> \u2013 aanvanklik die tweede beweging van sy eerste strykkwartet, later uitgebrei en deesdae selfstandig uitgevoer \u2013 wat aangebied is. Dis aantreklike werk in die Amerikaans elegiese skool \u2013 dink Copland, en natuurlik, Barber \u2013 en is sielvol uitgevoer.<\/p>

Caroline Shaw (1982 \u2013 ), nog \u2019n Pulitzer-wenner, se Plan & Elevation: The Grounds of Dumbarton Oaks<\/em> (2015) was net voor pouse op die program. Ge\u00efnspireer deur die fisieke ruimtes van Harvard se Dumbarton Oaks-instituut buite Washington, DC, en met titels soos \u201cThe Ellipse\u201d en \u201cThe Cutting Garden\u201d vir die vyf bewegings, is daar \u2019n besliste argitektoniese onderbou aan die musiek. \u2019n Mens het tog gevoel dit kon nie heeltemal kers vashou by die res van die program nie. Dit het niks met die uitvoering daarvan te make nie; dit is eerder die komposisie wat \u2019n bietjie na effekbejag voorkom.<\/p>

Oor Beethoven se Strykkwartet Nr. 7 in F-majeur, op. 59, nr. 1<\/em>, gekomponeer in opdrag van die Russiese graaf Razumovsky, had een kritikus van die tyd die volgende te s\u00ea, aldus die programnotas: \u201cDie konsepsie is diepgaande en die konstruksie uitstekend, maar hulle word nie maklik begryp nie.\u201d Vandag is di\u00e9 natuurlik \u2019n standaardwerk in die repertoire, maar steeds van simfoniese strekking, en dit was \u2019n indrukwekkende vertolking deur die kwartet. Van die sprankelende allegro<\/em> tot die verruklike adagio<\/em> het die dinamiese omvang van die groep veral opgeval. Die musici het hulle ooglopend geniet in die \u201cTh\u00e8me russe\u201d.<\/p>

Die konsert is afgesluit met \u2019n toegif wat oor twee kontinente gestrek het. Carol Ella is \u2019n bedrewe verwerker en het iets spesiaals voorberei: \u2019n Skotse reel <\/em>gevolg deur \u201cQongqothwane\u201d, die bekende Xhosa click song<\/em>, wat tradisioneel goeie geluk wil oordra. Daar was dus baie voetestamp op die verhoog, \u2019n ekstra lekkerny aan die einde van \u2019n marathon-uitvoering.<\/p>

\u00a0<\/p>