Miracle Tree is eerstens ’n kooruitvoering van Franco Prinsloo se oorspronklike musiek, waar daar ook die gesproke woord, klavier- en perkussiebegeleiding, asook beelde op ’n outydse truprojektor teen ’n muur is.

Die produksie is geïnspireer deur Bongekile Mbanjwa se gedig met dieselfde titel. Prinsloo se loopbaan as koorkomponis – hy het tans ’n kunstenaarsresidensie by die Universiteit van Johannesburg – het die afgelope paar jaar behoorlik vlamgevat, en ’n mens verstaan hoekom. Sy musiek het ’n spookagtige kwaliteit, en daar is ’n fokus op die skoonheid van eenvoud. Dit werk perfek vir hierdie soort produksie.

Sizwe Mondlane, die dirigent van Voices+, doen uitstekende werk, en so ook sy sangers. Die groep bestaan uit lede van die Universiteit van Johannesburg se koor en hulle sing met aandoenlike aanvoeling, nuanse, en sekuur intonasie. Kapenaars is met reg trots op hulle kore, maar hierdie is dalk ’n pleidooi vir ons hier in die suide om meer gereeld ons oë en ore ook na die noorde te rig, want ’n groep sangers soos hierdie verdien om vol sale te lok.