Wie sou kon raai dat koor sing en gedigte skryf die in-ding geword het? Dit voel soos die ander dag wat die ordentlike kinders op koorbankies gestaan het en in stil hoekies gedigte gelees het.

Maar toe kom digters soos Danie Marais, Tom Dreyer en Bibi Slippers en ’n man genaamd Pieter Bezuidenhout kry vir hom ’n koor in Kaapstad bymekaar en noem hulle die Stadskoor | -Choir | -iKwayara en daar is cool mense soos Jacques Bessenger, Madri Sutherland, Karli Heine en Marcel Spaumer wat saam sing.

Toe word dit alles bymekaargegooi en jy kry ’n produksie soos Stadskoor: Soekenjin waarin die koor die gedigte van Bibi Slippers lewend maak. Soos die feesgids dit beskryf: “Deur ’n kombinasie van nuwe gekomponeerde koormusiek en evokatiewe klanklandskappe verander Slippers se woorde in ’n ryk tapisserie van klank, ritime en emosie”. En dit is presies wat dit is.