Haar storie is dié van derduisende, sê Stephanie Baartman aan die begin van haar eenvrouvertoning Hoort – kinders met swart én bruin grootouers wat deur wetgewing in ’n sekere groep geplaas is. Net om jare later te besef jy is nie swart genoeg nie en ook nie bruin genoeg nie. Waar pas jy in? Waar hoort jy?

Dan vertel sy haar eie lewe tot nou met stories en musiek. Ja, sy is ’n aktrise bekend vir haar rol in Diepe waters, maar sy kán ’n storie vertel, iets wat akteurs nie altyd kan doen nie. Voeg daarby ’n stem wat jou tone laat krul van plesier en jy is in die palm van haar hand vir die volgende 80 minute. Janine Neethling verdien ook lof vir haar uitstekende begeleiding.

Stephanie is in 1985 gebore. Sy vertel van haar grootwordjare, oor haar ma en pa, boetie en sussie. Hulle eerste eie huis en hoekom die nommer 23 nog altyd haar gelukkige nommer is. Hoe geborge sy gevoel het met twee ouers, albei diep gelowig, wat haar en haar sibbe gekoester het en hoe sy van kleintyd af in die kerk gesing het.