Kaptein Kwanda stel ’n vraag aan die gehoor: “Wat is klimaatsverandering?” Ná ’n paar sekondes van kriek-kriek-stilte is die doel van die produksie klinkklaar: Bewustheid onder die jeug oor die erns van plastiekbesoedeling en seebewaring.

Jungle Theatre Company, ’n nieregeringsorganisasie wat daarop fokus om benadeelde kinders en jong mense te inspireer en te bemagtig, bied Captain Kwanda’s Fanplastic Adventures aan. Die produksie is gebaseer op die boek The Legend of Captain Fanplastic, wat spesifiek fokus op omgewingsbewustheid en die wêreld se afvalprobleem.

Kinders is nog nie noodwendig bewus van klimaatsverandering of aktief betrokke by die eko-kritiese landskap nie. ’n Mens kan wel nié te jonk begin dink en gesels oor hierdie belangrike onderwerpe nie.

Die gehoor sluit aan by ’n seevaart saam met Kaptein Kwanda en sy seeskilpadvriend, Fin. Die twee gaan op ’n reis om seediere te help wat deur plastiekbesoedeling beseer is. Die gehoor sluk hierdie bitter pil af met vlymskerp kletsryme, liedjies en danse. Só word die dieper erns van plastiekbesoedeling op ’n lighartige manier aan die gehoor bekend gemaak.