Kyk, niemand verwag dat ’n Maandagaand op ’n natterige fees ’n heerlike en warm belewenis kan word nie – veral nie in ’n stampvol Eendrag-teater waar daar nie plek vir ’n muis is nie.

Dit is natuurlik te verstane, want die eregas en komediant van die vertoning, Mel die Storieverteller (Melanie Welgemoed), is hipergewild. Só gewild dat sy nou al meer as 120 vertonings reg oor die land gehad het en met meer as 60 000 Instagram-volgelinge spog. Dis die meisie van Middelburg, Mpumalanga, wie se nostalgiese staaltjies en geaardheid net moeiteloos snaaks is! Sy kom steek die draak en besin oor al die dinge in haar groot sak.

Gewildheid op die internet het my nog nooit eintlik beïndruk nie. Maar dis waar dat selfs ek soms mense se video’s (ek sukkel nog met die woord “content”) verskriklik geniet. En dit bring ’n sekere vervoering om kortstondige vermaak so ombliklik op jou selfoon te kyk. Tog is nie almal op die internet snaaks nie, en soms is dit net vreemd hoe ons toelaat dat ander mense wat jy van g’n kant af ken nie, jou oprui. Ja, ek’s nie ’n maklike volgeling nie, maar ek verstaan die redes waarom almal anders so maklik mense min of meer verafgod.

Dit is nie die geval met Dik deurmekaar nie. Ek ken Mel die Storieverteller se werk nou al ’n ruk lank en is beslis een van haar volgelinge oppie Insta. Maar ek het nog nooit enige van haar verhoogvertonings gesien nie.