Deesdae lyk sake anders. Wanneer jy so gelukkig is om die liefde van jou lewe en die bewaarder van jou hart te ontmoet, dan is trou uiteraard die regte ding om te doen – en ook so gou doenlik. Dit maak nie saak of jy jou ridder net ses maande lank ken en jy nie eens weet wat sy gunstelingkleur is nie. Die liefde, blyk dit, is ’n bysaak, want jy het immers reeds jou vyfjaarplan in die sakkie en op skrif. En die uitspattige duur venue in die wynland.

Margo Kotze en Elmé Oosthuizen vertolk onderskeidelik ’n siniese strooimeisie met ’n sagte hart en ’n stralende bride-to-be in hierdie heerlike two-hander wat die trousaak van twee heel verskillende perspektiewe af beskou. Of doen hulle regtig?

Strooimeisie glo lankal nie meer aan die instelling van die huwelik nie – sy is ’n Africa Burner met ’n permanente staanplek, ’n Urbanol-voorskrif en ’n ernstige propensity vir reëlings en probleemoplossing. Geen krisis of common skoonma by ’n bachelorette of bloeiselbekakking van enige aard gaan haar stuit in haar taak nie. Sy sal selfs die bruid se rok vir haar rek en origamiduiwe vou as dit dan nou moet. Maar tog, dalk sou sy dit wél waardeer het om ’n plus one vir die troue te kon bring. Sy het immers al duisende rande gespandeer op ’n troue wat nie eens haar eie is nie. Nie dat sy mos wíl trou nie, jy weet?