In ’n klein, grys wêreldjie agter ’n grys muur woon twee kleurvolle grommels, Geelgrommel en Blougrommel. Meer verskillende karakters – in daad en wese – kan jy nie kry nie. Tog kan die een nie sonder die ander nie en mooi goed gebeur wanneer die twee bymekaarkom. Maar wat gebeur wanneer die muur skuif?

Dit help eintlik nie om ’n grommel te (probeer) definieer nie, maar Angelique Filter, skrywer en regisseur, beskryf dié twee as “dwergagtige narkarakters”. Die beter vraag is eerder: “Hoe is ’n grommel?”

Dan kan ’n mens antwoord dis die grommels se nuuskierige en speelse aard wat jonk en oud woordeloos voorstel aan die twee en jou meesleur in hulle denkbeeldige wêreld. Geelgrommel (beslis ’n oggendgrommel) en Blougrommel (presies die teenoorgestelde) se wêreld word omhein deur ’n digte grys muur, maar dit is juis hulle verskille en die akteurs se vernuftige uitbeelding daarvan wat dié produksie kleur gee. In ’n oomblik wanneer Geelgrommel in ’n poeletjie lig staan vir ’n bietjie sonskyn, kom ’n mens agter daar is iets spesiaals omtrent hierdie produksie.