Boodskappe van ons Borge
Kom speel dié lente
PROF. WIM DE VILLIERS
Rektor en visekanselier aan die Universiteit Stellenbosch
Met die koms van die lente is dit weer tyd vir voortreflike Woordfees-vermaak so uiteenlopend soos die lowerryke Stellenbosse eike. En in pas met vanjaar se feestema – “Speel” – nooi Matieland jou speels na ’n fees van drama, patos, humor en musikale prettigheid.
Ons doen dit nou al byna twee en ’n half dekades. Van ’n beskeie deurnagviering van die departement Afrikaans en Nederlands in 2000, het die fees oor die laaste 24 jaar gebot, gegroei en gedy tot een van die land se grootste meertalige kunstefeeste wat gemeenskappe saamsnoer om uitdrukking te gee aan die grensloosheid van ons verweefde mensheid.
Die fees staan aan die vooraand en voorpunt van verandering. As stigter en gasheer van die fees bly die US, saam met lojale donateurs en korporatiewe borge, verbind tot die fees en die aanbieding daarvan. ’n Belegging in die kunste is ’n belegging in die welwees van ons gemeenskap.
Vanjaar se tema, “Speel”, gee ons verdere rede vir blymoedigheid en opwinding. Trek die feesskoene aan en kom voeg nog vonkel by die vrolikheid van vanjaar se Toyota Stellenbosch Woordfees.
’N FEES VIR ALMAL
LEON THERON
Senior visepresident: Verkope en bemarking Toyota Suid-Afrika Motors
Toyota Suid-Afrika Motors is trots om weer saam te werk aan wat beloof om ’n werklik uitsonderlike Toyota Stellenbosch Woordfees 2024 te wees.
Dit is ons vyfde jaar in dié vennootskap, en ek weet Toyota word nou opreg as lid van die tribe aanvaar. Waarom sê ek so? Wel, feeste soos die Toyota Stellenbosch Woordfees bied ’n fassinerende insig in ’n groep individue wat gebonde is aan ’n gemeenskaplike begrip.
Dit is ’n unieke manier om kuns en kultuur ten toon te stel en ondersteun –noodsaaklike elemente in die lewenstof wat ons drome op kleurryke wyse voed terwyl dit die hede stimuleer.
Nóg belangriker is dat die Toyota Stellenbosch Woordfees ons in staat stel om deel te wees van iets groters, iets wat werklik ’n verskil sal maak in die lewe van baie begaafde mense in hierdie land. Talent is oral, maar geleenthede helaas nie – soveel jong mense met potensiaal uit onderverteenwoordigde gemeenskappe val ongelukkig deur die krake bloot omdat hulle nie weet wat beskikbaar is nie. Die Toyota Stellenbosch Woordfees gee aan hulle ’n platform om te “wys en vertel”, en dien as ’n katalisator om mense van alle agtergronde en lewenswyses op ’n uiters vermaaklike manier bymekaar te bring.
Toyota is insgelyks verenigend – ons is al langer as 44 jaar Suid-Afrika se gunstelingmotorhandelsmerk en maak herinneringe en smee vriendskappe wat ’n leeftyd hou. Verlede jaar het ons ons hoogste markaandeel tot nog toe gevier – Toyota vorm nou byna 27% van die plaaslike motormark. Dit beteken drie uit elke tien nuwe voertuie wat gekoop word, is ’n Toyota, en soveel meer lê nog voor. Toyota is aan die ontwikkel: Ons noem dit “Changing the future of cars”. Hiermee wens ons almal ’n fantastiese Toyota Stellenbosch Woordfees 2024 toe. Geniet dit!
SPEEL-SPEEL VORENTOE
HENRIËTTE LOUBSER
Hoofredakteur: Netwerk24 en
Media24 Afrikaanse Nuus
Vanjaar se feestema, “Speel”, is ’n onderskatte bestanddeel in die welstand van ons samelewing. Dis deur speel dat ons leer, skep, innoveer en daardie deurbraak- oomblikke met nuwe gewaarwordings en insigte beleef.
Die uitdagings in ons daaglikse bestaan is nie kinderspeletjies nie, maar ons kan op ’n kragtige manier daarvan sin maak deur die rolle wat akteurs op die verhoog speel; deur relevante rolspelers aan die woord te stel in ons aktuele gesprekke; en deur dít wat op die spel is te kontekstualiseer en uit te beeld.
Speel-speel – sonder om enigiets te ónderspeel! – kan ons vorentoe beweeg of ten minste voel ons verstaan mekaar en ons kwessies beter, al is niks voorspelbaar nie.
Kom kuier saam met ons by die Netwerk24-kafee, kom stel soggens vrae by die diskoersreeks met Netwerk24 se politieke redakteur, Gert van der Westhuizen, en die aanbieder Lynette Francis-Puren as gesprekleiers, en kom luister weer smiddae wanneer die Netwerk24-joernalis Mia Spies met interessante Suid-Afrikaners gesels. Onthou ook om ’n glasie te kom klink by die Sake & Sauvignon-gesprekke, waar Theo Vorster geldsake verteerbaar maak.
Baie geluk aan die Woordfees-span met die uitmuntende program. Dankie dat julle seker maak Afrikaans speel nooit tweede viool nie, maar hou inderdaad aan groei.
VALLEI VAN FEESTELIKHEDE
GESIE VAN DEVENTER
Uitvoerende burgemeester
Dit is altyd vir my besonder lekker om ons dorp se strate, teaters en restaurante so vol te sien gedurende die Toyota Stellenbosch Woordfees. Die fees is waarlik ’n hoogtepunt op die dorpskalender.
As jy deur hierdie feesgids blaai, sal jy verstom wees oor hoeveel talent vanjaar te sien en te hoor is. Die verskeidenheid van aanbiedings, opvoerings, konserte en gesprekke waaruit jy kan kies, is regtig indrukwekkend. Ek het reeds my lysie gemaak en moet bieg ek weet nie hoe ek by alles gaan uitkom nie!
As munisipaliteit strook ons betrokkenheid by die fees met ons doelwitte om ons inwoners deel te maak van die fees en toeriste van naby én ver na ons vallei te lok. Ons wil die plaaslike gemeenskap inspireer om nuwe horisonne te verken en baat te vind by die kulturele inspuiting wat die Woordfees jaarliks bring.
Benewens die fees het ons dorp, maar ook aangrensende kleiner dorpies, baie te bied. Geniet dit en probeer soveel as moontlik sien en doen terwyl die fees aan die gang is. Gaan stap, verken die bergroetes, besoek ons museums, ondersteun ons plaaslike ondernemings, eet by van die beste restaurante in die land en moet natuurlik nie huis toe gaan sonder wyn nie!
Geniet die fees!
