Ons storie
Die 2024 Toyota Stellenbosch Woordfees speel, spring en sing dié lente na hartelus met meer as 400 unieke produksies in nagenoeg 60 venues in en om Stellenbosch. En met vanjaar se feestema – “Speel”, nooi ons feesgangers om met oorgawe uiting te gee aan ’n eie spontaneïteit, om die pause-knoppie te druk, in die oomblik te wees en nuwe moontlikhede te ontsluit.
Ons bied ’n fees aan in die hoop en strewe om deur diverse uitdrukking en ons onderskeie ervarings, kunstenaars en gemeenskappe van dwardsoor Suid-Afrika saam te snoer. En om sodoende mekaar te vind en vier in ’n warrelwind van energie, kreatiwiteit, boeke, skrywers, teater, musiek, kuns, dans, diskoers, films en soveel meer.
Die Woordfees het in 2000 ontstaan as ’n deurnagviering van Afrikaanse woordkuns. En oor die laaste 24 jaar, het ons gegroei tot een van die grootste kunstefeeste in Afrika met omtrent 50 000 jaarlikse feesgangers.
“Speel” is ook ’n viering van die eienskappe wat van die Woordfees ’n veerkragtige fees maak: uitdrukking, innovering en die speelse vryheid van die kunste.
Gedurende die Covid-pandemie het die fees voortgeleef in nuwe innoverende gedaantes. In April 2021 is die Flikker & Flash-opwipvertonings in leë winkelvensters en in die strate van Stellenbosch aangebied. Die fees het ook dieselfde jaar geskiedenis gemaak deur die eerste Suid-Afrikaanse kunstefees te word wat op ’n opwip-TV-kanaal plaasgevind het. Woordfees TV is gebore. Hierdie pioniersprojek was so suksesvol dat dit ook in 2022 aangebied is, gevolg deur ’n fees in die vlees in Stellenbosch.
Kom leef jou eie speelsheid, spontaneïteit en kreatiwiteit – ongebreideld – in die Stellenbosse lenteson uit. Die Woordfees vind vanjaar van 28 September tot 6 Oktober in die Eikestad plaas.
Ons impak
Die Woorde Open Wêrelde-projek (WOW) kweek by leerders ’n liefde vir woorde deur leesbevordering, spelkompetisies, skrywersbesoeke en slypskole vir kreatiewe skryfwerk. WOW bereik jaarliks meer as 2 500 skole en 270 000 leerlinge dwarsoor Suid-Afrika.
Die WOW-projek open ook die wêreld van tersiêre opleiding vir leerlinge uit voorheen benadeelde gemeenskappe deur beurse, akademiese ondersteuning en mentorskap te verskaf om hierdie jong mense nie net toegang tot tersiêre geleenthede te gee nie, maar om hulle ook só te ondersteun dat hulle hul studies suksesvol kan voltooi.
Gedurende die Woordfees word ’n WOW-program aangebied wat lesers, onderwysers en skoolhoofde in die wynlande geleenthede gee om aan verskeie gesprekke en akademiese debatte deel te neem en ook ’n hele aantal uitvoerings by te woon wat liefde vir die geskrewe en gesproke woord stimuleer en bevorder.
US-koor
Die Woordfees bestuur en koördineer die gevierde Universiteitskoor Stellenbosch (US-koor) wat in 2018 skoonskip by die prestige-ryke Llangollen Internasionale Musiek-eisteddfod in Wallis gemaak het deur al drie kategorieë waaraan hulle deelgeneem het (Jeugkore, Gemengde kore en Oop kore) te wen. Die koorleier, André van der Merwe, het die Jayne Davies-prys vir beste dirigent by die Llangollen-eisteddfod ontvang. Die US-koor is sedert 2012 nommer een op die Interkultur-wêreldranglys van ’n 1 000 internasionale kore.
Hierdie merkwaardige koor bestaan uit 120 US-studente uit alle akademiese dissiplines wat saamgesnoer word deur hul liefde vir musiek en sang.
