“Wanneer die engel my kom haal, gaan ek aan my ouma en hierdie boek dink,” sê Nataniël by die deftige funksie vir Bloei + Blom, die koffietafelboek waarby hy betrokke was en wat onlangs bekend gestel is. Dit is by Lanzerac gehou en het ’n driegangete ingesluit. Die kaartjieprys was R1 150 wat ’n eksemplaar van die boek (die verkoopprys is R850) ingesluit het, maar dit het feesgangers skynbaar nie afgeskrik nie en ’n tweede funksie is gereël wat ook uitverkoop het.

Die opdrag vir die boek het uit Stellenbosch gekom: Maak ’n boek om Afrikaanssprekende Suid-Afrikaners te vier. Nataniël het ’n groep mense bymekaar gekry, onder meer sy vriendin Diane de Beer en die uitgewer Ingeborg Pelser, met die musikant en sakeman Matthys Maree wat met die idee gekom het.

Ná maande en maande se werk, en met medewerkers soos Murray la Vita, Hanlie Retief, Melvyn Minaar en Michael le Cordeur wat bygedra het, is die boek uiteindelik op die rak. Dit is, soos Nataniël dit beskryf het, “twee buiteblaaie met vreugde tussenin”.