’n Paar jaar gelede het die KKNK vir LAPA-uitgewers genader om iets oor kinderboeke by die fees te doen, en so is die LAPA-lekkerleesminuut gebore. Maar hoe maak jy dit vir onwillige kinders én die sleepvoet-ouers aanloklik, toeganklik en prettig genoeg om te kom sit en luister na ‘n storie? Jy vra die mense wat op die feesverhoë hulle kuns pleeg om hand by te sit, natuurlik. En hoe kan húlle weier? Dis dan vir die kinders! En inderdaad vir die toekoms van die land. Ná die KKNK het ander feeste van die leesminuut te hore gekom, en nou – vier jaar later, verskeie feeste, baie stories en ’n klomp ywerige celebs soos Rolanda Marais, Dean John Smith en Marion Holm later – word hierdie stukkie boekvreugde vir die eerste keer by die Toyota Stellenbosch Woordfees aangebied. Vir Cindy Swanepoel, wat pas by Momentum Aardklop vir die span kinders en grootoog ouers voorgelees het, is dit ’n no brainer om aan die leesminuut deel te neem: “Dis ’n eer en ’n voorreg om vir die kinders te lees, want hulle moet leer om hulle verbeelding te gebruik. En ek dink ons moet dit vir grootmense ook doen, want hulle vergéét om hulle verbeelding te gebruik! Ek love dit om stories in te kleur en te vertel, en dis te lekker om hulle gesiggies te sien wanneer jy dit doen!”

Dis ’n ongebreidelde vreugde om gewilde kunstenaars te sien wat nie huiwer om hulle talente te deel onder ’n boom of in ’n tent vol vuil spelende kinders wat tussendeur hard gesels en vrae vra nie. En hulle doen dit nie vir applous of erkenning nie, maar vir ‘n kortstondige oomblik wat dalk ’n klein lewe kan verander of selfs red, soos dit met Neil Sandilands die geval was: “Juffrou Elsie Senekal en oom Dana Niehaus het my lewe gered. Ek kan tot vandag toe Jakkals en Wolf quotes gooi by die braaiparty. As ek tussen Stellenbossers moet verkeer, kan ek op my eie voete iets oor David en By fakkellig opdis en myself as belese vent voordoen. Ek het beide doepas oraal beluister en dit was inderdaad op verskillende tye van my lewe net die regte eliksers. Meer nog, dit het wêrelde ontsluit wat my tot vandag toe die die see laat invaar, die berg laat klim, stok en hoed, sak vol moed. Noem my sommer Hans die Skipper, of sir Edmund, hetsy ons in Gansbaai of in die Akker mekaar se menswees meet.”