RESENSIE

Die hele wêreld moet van Luna weet

deur Ilza Roggeband
Produksie: Saam (all)een
Foto’s: Nardus Engelbrecht

Dit is nou die een ding van Luna Paige. Sy bring altyd iets nuuts, altyd die beste musikante om saam met haar die verhoog te deel en altyd die beste oorspronklike musiek. Ook altyd alles van haarself. Haar stem, haar talent, haar woorde – dít wat sy sing en dié wat sy as bindingsteks gebruik. 

In my lewe is ’n paar tergende vrae wat ek nie weet of dit ooit beantwoord gaan word nie: Wen iemand ooit die Davisbeker? Hoekom is ’n fortuin nooit genoeg vir skelms nie? Hoekom moet hulle altyd meer steel? Hoekom is vissmeer werklik van die mark afgehaal en is botter nou weer goed vir die mens? 

Ook: Hoekom op dees aarde is Luna nie meer bekend nie? Nevermaaind internasionaal, maar ook plaaslik? Hier het ons ’n sanger en liedjieskrywer met álles. ’n Sterk stem – dis altyd ’n lekkerte om te hoor hoe sy praat en hoe sy sing, want die een klink nie soos die ander nie – wat haarself op kitaar en klavier begelei. Haar lirieke beteken werklik iets. Wanneer sy ’n gedig berym, weet jy sy het dit met die grootste sorg gedoen. Sy is sonder twyfel so helder en so geskakeerd soos die maan waarna sy vernoem is. 

Luna is begelei deur Frank Freeman (kitaar), Schalk Joubert (baskitaar) en Jonno Sweetman (tromme) en saam met hulle op die verhoog vir die laaste deel van die konsert, was die Zolani Youth Choir;  ’n koor van Zolani buite Ashton wat onder leierskap van Odwa Mbunge wys dat koorsang net soveel vir ’n jongmens as ’n bal in enige vorm kan beteken. Die koor word, soos Luna, deur ClemenGold ondersteun en geseënd is maatskappye soos hulle wat sien watter waarde die kunste in ons gemeenskappe het. 

Die konsert, waar Luna ons op ’n reis neem vanaf enige mens se alleen in die wêreld kom tot weer alleen vertrek, was ongelukkig net een keer op die fees te sien. Hou dus jou ore oop vir wanneer dit elders weer gebeur en gáán gebeur. Laai sommer al Luna se musiek ook af. Daar is nuwe musiek op pad en ek kan nie wag om “I’d rather be alone than alone in love” af te laai en weer en weer te luister nie. 

Facebook
Twitter
LinkedIn