Waar het jy en Wynand mekaar raakgeloop? En hoeveel van die nuwe show is stand-up – of het julle ’n vaste teks en regisseur?

Ek het die eerste keer van Wynand te hore gekom op die internet êrens. Hy is groot op TikTok. ’n Paar jaar gelede – nog voor hy Tollie gedoen het – het hy ’n onderhoud met my gedoen. Eers later kom ek toe agter hy doen drag. Hoe sê ’n mens nou weer op Afrikaans? O ja, hy fopdos.

Ek moet erken ek het nog nooit ’n show van Tollie gesien nie, maar ek het wel gehoor daarvan. Toe kom Carien en sê Tollie en Greetje saam kan ’n prettige affêre wees…

Ons het mekaar op Knysna gekry waar ons na raakpunte gesoek het. Carien het gesê “praat ’n bietjie hieroor” of “praat ’n bietjie daaroor”, en dis hoe al die onderwerpe bymekaargekom het. Daar is elemente van stand-up, maar dit is meer Wynand se storie.

Die probleem met Greetje vir hierdie show was dat sy nog altyd net ’n paar minute lank was in my one-man shows – nooit in die hele show nie. Met hierdie show het ek gesê “kom ons kyk of Greetje ’n langer lewe kan hê”.

Dis nie ’n baie diep show nie. Daar is wel dieper dinge, maar soos met enige satire of humoristiese show is die dieper dinge onderliggend. As jy dit wil hê of sien, kan jy dit gebruik; anders kan jy dit ignoreer en net die lawwigheid geniet.

Wat het jy en Wynand in gemeen as komediante, en is daar enige verskille waaroor julle moes onderhandel – wat bly en wat gly?

Ek het onmiddellik besef Wynand is baie intelligent. Ek hou van slim mense. Ons humor is ook relatief dieselfde, selfs al is hy van ’n jonger geslag.

Nee, ons het nie onderhandel nie. Ons het elkeen gaan sit en gedagtes neergepen, en dan het ons bymekaargekom en besluit wat ons gaan gebruik en wat nie. Ons samewerking het baie natuurlik gevloei.

Wat is die sterkste eienskap of kwaliteit wat jy na julle vertoning bring? En wat is volgens jou Wynand s’n?

Wat Greetje betref, is my bydrae om te onthou dat sy ’n lawwe tannie is. Ek onthou dan maar altyd dat my ma die impetus vir die karakter was. Die invalshoek van die vertoning is dat Tollie Parton ’n geselsprogram het en een van haar gaste is Greetje. Tollie is baie ingenome en opgewonde om haar as ’n gas te hê. Die vroutjie met die snaakse vlegsels is al jare lank ’n randfiguur in die Suid-Afrikaanse komediewêreld, en dalk is dit vir die gehoor interessant om meer oor haar te leer, soos waar sy nou eintlik presies vandaan kom, ensomeer.

Dít is wat die vertoning is: Dis ’n geselsprogram van Tollie Parton en haar gas is Greetje – met al haar skete en kwale en plooie en gewoontes en liedjies.

Laastens: Is Greetje Appelmoes ’n ‘drag queen’ soos Tollie Parton of net ’n minlike Hollandse tannie? Wat dink sy van Tollie Parton?

Dis hier waar die vertoning ’n interessante kinkel kry. Op die keper beskou, ís dit natuurlik ’n drag show, want ons is albei mans in ’n rok. Twee genres van drag kom hier bymekaar, maar natuurlik dink ’n mens nie aan Greetje as ’n drag queen nie, maar as ’n Hollandse tannie. Dit is waar die oulikheid van die karakter lê: Sy is ’n drag-tannie.

Maar eintlik is sy ’n vaal ou tannie – ek het nie moerse make-up of so aan nie. Ek is maar net die tannie. Wynand is Tollie, die uitbundige en omstrede tannie met die diep stem en stoute uitdrukkings. As my ma moes hoor wat Tollie alles te sê het, sou sy sê: “O, dis verskriklik” of “Jy is nogal gewaagd, nè!” Maar op ’n oulike manier – dis presies hoe Greetje op Tollie reageer. Greetje is nie op haar bek geval nie, en dáárin lê die pret van die show.

Dis vir my ’n lekker gemaklike vertoning en ek hoop dis hoe die mense dit ook sal ervaar. Dis nie diep of wroegend nie. Dis net pret.