Die drie verras ons werklik met hulle antwoorde – van die steel van ’n baba-tietiebottel of Maja-die-by lucky packets op ’n jong ouderdom en natuurlik om mense ʼn rat voor die oë te draai – wat duidelik aandui dat hulle loopbaan ’n kriminele rigting sou inslaan. Pieter sê hy was nie regtig stout nie, eintlik ’n regte sweetie, want niemand sou hom van stoutighede verdink het nie. Bibi ontmasker gou die versteekte kriminele neigings in die beskuldigdes: ’n tantalising mengsel van diefstal, sabotasie en geweldsmisdaad, en voeg daarby deception deur die immer ontwykende Irma Venter.

Die volgende vraag aan elkeen was watter naam hulle sou kies as hulle ’n speurder of moordenaar in hulle eie boeke was. Irma vat die koek hier met haar speurder se naam: Mr Noah Itall (know it all) en daar vang Irma vir Bibi, die kriminele sielkundige, en die hele gehoor uit – tipies in haar styl as ’n uitmuntende krimi-skrywer.

Nog steeds besig met die ondersoek vra Bibi: Wie sou hulle kies om ’n medepligtige in ’n moord te wees? Erla kies onder andere vir Trump omdat hy met alles wegkom. Pieter sê dit hang af wié jy gaan doodmaak, maar hy kies sy halfboetie omdat hy dit vir hom sal doen as dit die regte ding is om te doen. Irma neem hier die leisels oor: Vir die perfekte moord sal sy dit alleen doen, want sy sal niemand vertrou nie en natuurlik kan niemand jou dan later verraai nie. Briljant! Tot dusver is Bibi, die kriminele sielkundige, se geld op Irma as die een wat beslis nie vasgetrek sal word nie.