Daar is iets geweldig roerend aan iemand wat komedie gebruik om te probeer vergeet van die klippies in hulle eie skoene. Komediante wat sukkel met die donker kant van die lewe, kan op veel meer as twee hande getel word. Soos iemand op ’n dag gevra het: As lag die beste medisyne is, hoekom is so baie grapmakers hartseer? 

Llandi Beeslaar werk al langer in die vermaakbedryf as wat mense moontlik besef. Sy het in 2017 Uitkampteater by die KKNK gedoen en intussen agter die skerms op verskeie TV- en verhoogproduksies gewerk. Sy was Mielie Senekal in Republiek van Zoid Afrika en vanjaar het sy werklik deurgebreek met haar uitstekende spel as Stefanie Koekemoer in die Showmax-reeks Koek, ’n rol wat haar ’n Silwerskerm-benoeming as beste vroulike byspeler in ’n drama besorg het. 

Tomboy is haar eerste volle eenvrouvertoning waarmee sy by die Woordfees debuteer. Met ’n mikrofoon in die hand vertel sy haar eie storie. Hoe sy met sterre in haar oë Londen toe is en terug in Suid-Afrika besef het die vermaakbedryf is ’n maalkolk met rolle yl gesaai. Sy is openlik oor haar stryd met geestesgesondheid, erken dat sy baie issues het. Haar seksualiteit is egter nie een daarvan nie. “Ek het besef less is more,” sê sy.