Daar is produksies op die fees wat of al by ander feeste of in teaters in die Kaap op die planke was. As jy dit dus misgeloop het, is dit nou jou kans. ILZA ROGGEBAND beveel tien aan wat sy reeds gesien het. 

’n Akkerboom

Hierdie produksie het in 2022 sy debuut by die Woordfees gemaak en was intussen by verskeie ander feeste te sien. ’n Man verloor sy dogter in ’n motorongeluk. ’n Hipnotiseur wat vir die ongeluk verantwoordelik was, is ook nie meer die man wat hy was nie. Op die verhoog is die hipnotiseur en ’n akteur – manlik of vroulik – wat die rol van die pa vertolk. Die kinkel in die kabel: Die akteur het nie ’n woord van die teks gelees nie en is dus totaal onvoorbereid vir wat kom. Elke vertoning het ’n ander akteur wat die verhoog met De Klerk Oelofse, in die rol as die hipnotiseur, deel. 

A Midsummer Night’s Dream

Maynardville, die buitelugteater in Kaapstad, is bekend vir sy Shakespeare-produksies en vroeër vanjaar het A Midsummer Night’s Dream aan die beurt gekom. Onder die groot bome met ligte wat deur die blare loer, was dit die ideale omgewing vir dié Shakespeare-stuk. By vanjaar se Woordfees word dit by die amfiteater by Oude Libertas opgevoer wat beslis met Maynardville kan meeding wanneer dit kom by ’n buitelugteater. ’n Groot hoogtepunt van die produksie is Michael Elderkin as Bottom. Sy vertolking alleen is die kaartjieprys werd. 

Magda Louw

Dis asof Magda Louw ’n kringloop by die Woordfees voltooi. In 2017 was Desiré Gardner by die fees met haar eenvroustuk Magda Louw. Magda het ’n lewe van haar eie gekry en later nie net ’n Storiefilm op kykNET geword nie, maar ook ’n volle komediereeks van 13 episodes met ’n tweede seisoen op pad. By vanjaar se Suidoosterfees het Desiré ’n nuwe eenvroustuk aangebied en as jy bang is dat dit dieselfde is as die eerste stuk, die film of die reeks, moenie vrees nie. In die nuwe produksie is Magda ’n motiveringspreker en soos net Magda kan, laat sy jou lag dat die trane loop en as jy weer sien, wil jy tjank.