Chaoties is die enigste manier om Netphlix te beskryf. As gehoorlid weet jy met tye nie of dit georganiseerde chaos is wat veronderstel is om so te wees nie, maar waddehel, go with the flow and all that.

Sophie Joans is die jong aktrise wat probeer om in minder as ’n uur haar gehoor te vermaak met die reekse wat tans op Netflix is. Sy begin deur te vertel hoe haar agent haar opgewonde gemaak het met die nuus dat sy moontlik vir ’n rol in ’n Netflix-reeks oorweeg word. Natuurlik begin sy daaroor droom om ’n kar te koop en finansieel onafhanklik te word, maar haar borrel word gebars wanneer sy nie die rol kry nie en sy erken teater is eintlik haar eerste en grootste liefde.

Met beweging, gesigsuitdrukkings, musiek en ’n paar rekwisiete rits Sophie deur reekse soos The Crown, Sex Education en Emily in Paris. Elke dan en wan word iemand in die gehoor gevra om te kom meedoen. Sommige is onwillig – “jammer, ek het pas ’n heupvervanging gehad” – maar gelukkig is daar altyd iemand wat sal hand opsteek en saamspeel tot groot vermaak van die gehoor.