Stinkie en Professor Bombelbos is skeppings uit die pen van Sjaka S. Septembir, wat in dié narrespel albei karakters vertolk. Die twee verskil soos dag en nag – prof. Bombelbos is ouer en ernstig, terwyl Stinkie ’n kinderlike geaardheid het. In sekere dele word die karakters met handpoppe voorgestel, maar as ’n asblik vir jou kan blaf, is dit sekerlik nie vreemd nie.

Sjaka steek só draak met die kontras tussen streng grootmensreëls en die kinderlike drang om dié reëls juis te oortree en te kyk presies hoe ver ons die grense kan toets. Dít doen Stinkie baie suksesvol, hoewel alles wat in sy hande beland, skielik in iets lewendigs verander. Die sambreel kry skielik ’n lewe van sy eie, die mop begin blaf en daar is selfs ’n koffer wat kan vlieg!

Die gebruik van die rekwisiete en byklanke daarmee saam dra by tot die gevoel van wonder en nooi die gehoor saam op ’n verbeeldingsvlug. Die stel is bont en besig, maar dit word amper ’n bysaak, want Sjaka beperk homself nie net tot die verhoog nie. Die gangetjie word óók sy speelveld en die kleinspan (asook hulle ouers) bly vasgenael sit en wag om te sien wat volgende gaan gebeur.