Dis Blake Hellaby wat met die intrapslag die konsert begin deur die kwartet voor te stel waarna sy vrou en sanger, Lea Venga, saam hulle die eerste vertoning lewer. Haar stem is sag en diep, maar vloei soos soet soos karringmelk. Hulle is van die Kaap se beste jazz-musikante en hulle tegniek is moeiteloos. Daarna volg die rymkletser Early B wat van sy bekende treffers op ’n andersoortige manier doen. Dit verseker dat die gehoor die skerpheid van sy verse kan hoor – hy is inderdaad net soos enige ander kunstenaar by die fees ’n storieverteller in eie reg. Dis “Ben10” en “Lekke djy” wat almal aan die roer kry. Die enigste jammerte is dat daar geen van sy liedjies van sy nuutste platinumalbum Funky-kaans gesing  is nie. Dit is een van my gunsteling-albums van 2021. 

Die kaptein van seile neem oor en vertel bekoorlik hoe hy sy vrou van 11-jaar, Duané, ontmoet het en daarna twee liedjies vir haar geskryf het om te bewys dat hy glad nie kommin is soos haar agent van hom gesê het nie. “Dis Hemel op Tafelberg” en “Standing on The Edge”, wat na al die jare nog net so treffend klink, en jy verstaan hoekom Darren steeds op die kruin van sy loopbaan is. 

Maar dit is kitaarfenomeen en popvervaardiger Loki Rothman, wat skitter en die gehoor in vervoering laat met sy talent. Soos Darren ook beaam voor Rothman se tyd op die verhoog: “Hierdie is een van die talentvolste kunstenaars in ons land!” En na afloop van sy set kry Rothman ’n driftige applous van die gehoor, wat hy as ’n bederftoegif beantwoord het met sy one-man band-weergawes van “Uptown Funk” en ’n Eminem-medley van sy bekroonde The Marshall Mathers-album.