Toyota Stellenbosch Woordfees, 3 – 11 Oktober 2026: Program bekend 

Die 2026 Toyota Stellenbosch Woordfees-program is Donderdagaand bekend gestel tydens ’n voorskougeleentheid by Asara-wynlandgoed. Die jaar se tema is: Dis hoog tyd!

“Tyd is ’n skaars kommoditeit,” sê Saartjie Botha, direkteur van die Toyota Stellenbosch Woordfees oor die keuse van die feestema. “Daarom is dit hoog tyd om in die kunste te belê deur jouself die tyd te gun om nuwe herinneringe saam met vriende en familie, selfs vreemdelinge, te maak terwyl jy jou oopstel aan die wonderwêreld van die kunste. ’n Wêreld waar oomblikke momentum bou, begin vloei en uiteindelik energie oor jou laat spoel wat tyd ophef.”

Met meer as 444 items op die grootste kunstefeesprogram in die land, is die oorvloed van produksies ’n waardevolle noodsaaklikheid in ’n kunstelandskap wat onder groot druk verkeer. Daar is hulp om deur die groot programlys te navigeer – die volle feesprogram is aanlyn beskikbaar om af te laai, maar die gratis gedrukte feesgids is en bly ’n waardevolle handleiding om jou ideale feeslys saam te stel. Die jaar is Aramex weer die fees se voete en hande om dit by jou uit te kry. Registreer op ons webtuiste, by woordfees.co.za, en dit word by jou deur afgelewer. Geen bestemming in Suid-Afrika is te ver nie. Kaartjieverkope open 18 Junie vir die publiek en is reeds oop vir lede van die Toyota Stellenbosch Woordfees-lojaliteitsprogram – lees meer oor die verskeie lojaliteitspakkette op die fees se webwerf. 

“Met 15 weke om te beplan is dit nou die tyd om ’n feesgids nader te trek en te beplan aan ’n unieke feeservaring. Daar is iets vir almal, met uitstaande werk van ons voorste kunstenaars,” sê Saartjie.

• Kom span uit met jou kampstoel by die Toyota Musiekfees-opelugkonserte by die Jan Marais-natuurreservaat. Jeremy Loops, Booshle G., Zaan Sonnekus en Tasché en Spoegwolf bring die klanke. 
• Bring jou instrument na die Jazz at the Konserve-reeks om ná elke vertoning saam met die kunstenaars te jam. 
• Amanda Strydom vier haar 70’ste saam met die Kaapstad Filharmoniese Orkes op in ’n vertoning wat een vir die boeke gaan wees. Anton Goosen dien alle gerugte van oud en koud die nekslag toe met Magtig, kyk wie’s 80.
• Vusi Mahlasela, Jak de Priester, Glaskas, Stille vuur met Coenie de Villiers en Frieda van den Heever, Joshua na die reën, en ’n viering van Louis Prima (Prima!) se swing met Bianca Flanders, Dean Balie en die US-blaasorkes onder leiding van Ramon Alexander, lyk almal na produksies waarvan die kaartjies gaan vlieg.
• Die Toyota Stellenbosch Woordfees en Strauss & Co. se kunsveiling vind vanjaar in die Stadsaal plaas, waar die kollig val op artistieke uitnemendheid en erkenning van kontemporêre style.
• Daar is nege debute op die Spier Toneel-program. Hieronder tel My kind druip (Shimmy Isaacs), Skanse (Dawid Minnaar), Vlindervry (Cindy Swanepoel), ’n Middel (Tinarie van Wyk Loots), die wenstuk van die 2026 Reinet Nagtegaal-teksprys, Grootmeisie (Daneel van der Walt), Krapp se laaste band (Carel Nel), I Lord Hamlet (Carlo Daniels), Wie call die shots? (Miché van Wyk) en Elke briljante ding (Albert Pretorius). 
• Die woord sit nie verniet heel voor in die Toyota Stellenbosch Woordfees se naam nie: Boeke en skrywers bly die hartklop van die fees. Vanjaar is daar meer as 50 aanbiedings op die EasyEquities Skrywersfees. Lesers, denkers en boekmense kan uitsien na boeke oor alles van rugby tot resensies, geld en geskiedenis, huwelike, honde, en hoe om ’n lewe te maak op ’n leë stuk grond in die Karoo. 
• Op die Leefstylprogram is daar ’n behoorlike smorgasbord van smake en ervarings: 13 demonstrasies uit blinknuwe kookboeke, met jou gunsteling- TV-kosmense, sosiale media-sterre en kosskrywers op die verhoog in die Hofmeyrsaal se demo-kombuis. 
• Die Spier Toneel-program bied ook ’n goeie skeut humor met komediante soos Marion Holm, Marc Lottering, Marianne Thamm, Schalk Bezuidenhout en Nik Rabinowitz. 
• Ensembles soos Darkroom Contemporary, Reach for the Stars, SboNdaba Dance, Jazzart Dance Theatre, Figure of 8 Dance Theatre, Stellenbosch Balletvereniging en Garage-dansensemble vertaal die ekspressiewe taal van dans. 
• Jaco van der Merwe het nog ’n blink én bekostigbare filmfees saamgestel met 17 speelfims en nege kortfilms, wat insluit die 2026 kykNET Silwerskermfees-program, Nico Scheepers se riller Hen, ’n reeks “poëtiese” dokumentêre wat hy beskryf as “dokufiksie”, horror-gore, Hip Hop en meer. Die meeste van die flieks op die filmfees is gratis, terwyl die speelfims billik geprys is teen R60 en R70. Laat die reuk van springmielies jou innooi by die Road House Cinema in die Neelsie en kom kyk waarom daar steeds ’n behoefte is om flieks op die grootskerm te sien. 

Toyota Stellenbosch Woordfees, 3 tot 11 Oktober. Kaartjies by Quicket.